Gwasanaethau i Awduron

Gwasanaeth Beirniadu

Mae Gwasanaeth Beirniadu yr Academi yn galluogi ymgeiswyr i gael eu gwaith wedi’i ddarllen a’i asesu gan awdur profiadol. Er bod ffrindiau a pherthnasau yn aml yn gefnogol, gall barn fwy gwrthrychol helpu awduron i wella eu gwaith. Bydd y darllenydd yn ysgrifennu adroddiad o tua 1,000 o eiriau a fydd yn feirniadol, yn ystyr gorau’r gair. Bydd y darllenydd ond yn ymdrin ag ansawdd llenyddol y gwaith a gyflwynir. Ni fydd yr ymgeisydd yn gwybod pwy yw’r darllenydd, nac fel arall.

Barn bersonol y darllenydd a roddir ac ni fydd yn cynrychioli barn yr Academi mewn unrhyw fodd. Cadwn yr hawl i ddychwelyd gwaith na fyddai’n debygol o fanteisio ar y Gwasanaeth Beirniadu ar hyn o bryd.

Cymhwyster

Mae Gwasanaeth Beirniadu yr Academi ar gael yn unig i awduron sy’n byw yng Nghymru neu awduron sy’n ysgrifennu yn yr iaith Gymraeg.

Sut mae’r Gwasanaeth Beirniadu yn gweithio?

• Cwblhewch y ffurflen gan amgáu sampl fer o’r gwaith.
• Ni ddylai’r sampl fod yn fwy na 200 llinell o farddoniaeth neu 3,000 gair o ryddiaith.
• Rhaid teipio’r gwaith ar un ochr y tudalen yn unig, a rhifo pob tudalen.
• Gofynnir i chi beidio rhoi’ch enw ar y teipysgrif.
• Cadwch gopi o’r hyn a anfonwch bob tro: ni all yr Academi fod yn gyfrifol am destunau gwreiddiol a gollir.
• Anfonwch y ffurflen wedi’i chwblhau, a’r dogfennau atodedig, ynghyd â’r taliad at Academi (cyfeiriad isod).
• Mae’r gwasanaeth ar gael gydol y flwyddyn. Gellir defnyddio’r gwasanaeth un waith mewn cyfnod o ddeuddeng mis.

Y Gost

£10 yw’r ffi ar gyfer pob sampl fer. Gellir cael adroddiad mwy cynhwysfawr ar waith hwy neu waith gorffenedig. Y ffi ar gyfer nofel, hunangofiant neu fywgraffiad llawn yw £25 am 200 o dudalennau neu lai a £10 am bob 100 tudalen wedi hynny. Dylid gwneud sieciau ac archebion post yn daladwy i: Academi.

Pryd a ddychwelir yr adroddiad?

I gael derbynneb am y gwaith, bydd angen ichi amgáu amlen â’ch cyfeiriad a stamp arni. Anfonir yr adroddiad atoch o fewn 12 wythnos. Gofynnwn i chi beidio â ffonio i holi am y gwaith yn ystod y cyfnod hwn.

Cliciwch yma i ddadlwytho ffurflen gais

Gwasanaeth Beirniadu yr Academi ar gyfer Awduron
Academi
Prif Weithredwr Peter Finch
Tŷ Mount Stuart
Sgwâr Mount Stuart
Caerdydd CF10 5FQ
ffôn: 029 2047 2266
ffacs: 029 2049 2930

I gael ffurflen gais e-bostiwch ni ar post@academi.org gan nodi eich cyfeiriad post.

Yr Academi yw’r Asiantaeth Genedlaethol er Hyrwyddo Llenyddiaeth  a Chymdeithas Llenorion Cymru. Rhif Elusen Gofrestredig 506402. Cefnogir yr Academi gan Gyngor Celfyddydau Cymru a Llywodraeth Cynulliad Cymru.